രാജ്യത്ത് പ്രവര്‍ത്തിക്കുന്ന വിമാനത്താവളങ്ങളില്‍ 85 ശതമാനവും നഷ്ടത്തിലെന്ന് റിപ്പോര്‍ട്ട്. പൊതു-സ്വകാര്യ പങ്കാളിത്തത്തിലുള്ള വിമാനത്താവളങ്ങളുള്‍പ്പെടെയുള്ള കണക്കാണിത്. വ്യോമയാന മന്ത്രാലയമാണ് കണക്ക് പുറത്ത് വിട്ടത്.
എയര്‍പോര്‍ട്ട് അതോരിറ്റിയുടെ കീഴിലുള്ള 125 വിമാനത്താവളങ്ങളില്‍ ലാഭത്തിലുള്ളത് വെറും 18 എണ്ണം മാത്രമാണ്. അതില്‍ വര്‍ഷത്തില്‍ പത്ത് കോടിയുടെ ലാഭമെങ്കിലും ഉണ്ടാക്കിയത് കരിപ്പൂര്‍ ഉള്‍പ്പെടെ 11 വിമാനത്താവളങ്ങള്‍ മാത്രമാണ്.
സ്വകാര്യ പങ്കാളിത്തമുള്ള 14 വിമാനത്താവളങ്ങളില്‍ കൊച്ചിയുള്‍പ്പെടെ മൂന്നെണ്ണമാണ് ലാഭത്തില്‍ പ്രവര്‍ത്തിക്കുന്നത്. രണ്ട് വര്‍ഷത്തിനകം കോഴിക്കോട് ഉള്‍പ്പെടെ 25 വിമാനത്താവളങ്ങള്‍ കൂടി സ്വകാര്യവത്കരിക്കും.
സ്വകാര്യപങ്കാളിത്തമുള്ള വിമാനത്താവളങ്ങളില്‍ ബെംഗളൂരു- 528.31 കോടി, കൊച്ചി-267.17 കോടി, ഹൈദരാബാദ്-32.99 കോടി എന്നിങ്ങനെയാണ് ലാഭമുണ്ടാക്കിയ കണക്ക്. ഏറ്റവും നഷ്ടം നേരിട്ടത് അഹമ്മദാബാദ് എയര്‍പോര്‍ട്ടിനാണ്. 408.51 കോടിയുടെ നഷ്ടമാണ് വിമാനത്താവളത്തിനെന്ന് റിപ്പോര്‍ട്ടില്‍ പറയുന്നു. കണ്ണൂര്‍ വിമാനത്താവളത്തിന് 131.98 കോടിയാണ് നഷ്ടം നേരിട്ട കണക്ക്.
കോഴിക്കോടിന് പുറമെ, കൊല്‍ക്കത്ത, ചെന്നൈ, പൂനൈ, ഗോവ, തിരുച്ചിറപ്പള്ളി, ദേവ്ഗഢ്, ശ്രീനഗര്‍, ജൂഹു, കോയമ്പത്തൂര്‍, ഭുഭനേശ്വര്‍ എന്നീ എയര്‍പോര്‍ട്ട് അതോരിറ്റി വിമാനത്താവളങ്ങളാണ് ലാഭമുണ്ടാക്കിയത്.
