ശീതക്കാറ്റും മഞ്ഞുവീഴ്ചയും മൂലം അമേരിക്കയിൽ 4,400 വിമാനങ്ങൾ റദ്ദാക്കി. ബസ്, ട്രെയിൻ ഗതാഗതവും തടസപ്പെട്ടു. ജനങ്ങൾ ജാഗ്രത പാലിക്കണമെന്ന് അധികൃതർ നിർദേശം നൽകിയിട്ടുണ്ട്. അതേസമയം 40 വർഷത്തിനിടയിലെ ഏറ്റവും തണുപ്പേറിയ ദിവസങ്ങളാണ് വരാനിരിക്കുന്നതെന്ന് അധികൃതർ മുന്നറിയിപ്പ് നൽകി.
വെള്ളിയാഴ്ച്ച മാത്രം 2,700 വിമാന സർവീസുകളും ശനിയാഴ്ച്ച രണ്ടായിരത്തോളം വിമാന സർവീസുകളുമാണ് ശക്തമായ മഞ്ഞ് വീഴ്ച്ച മൂലം റദ്ദാക്കിയിരിക്കുന്നത്. കൂടാതെ 8,450 വിമാനങ്ങൾ ഇന്ന് വൈകിയോടുമെന്നും അധികൃതർ അറിയിച്ചു. അമേരിക്കൻ എയർലൈൻസ്, യുണൈറ്റഡ് എയർലൈൻസ്, സൗത്ത്വെസ്റ്റ് എയർലൈൻസ് എന്നിവയുടെ മൂന്നിലൊന്ന് ഫ്ളൈറ്റുകളും ഇന്ന് വൈകി ഓടും.
എന്നാൽ ക്രിസ്മസ് പ്രമാണിച്ച് കുടുംബത്തിനടുത്തേക്കും മറ്റും യാത്ര ചെയ്യാനിരുന്ന നിരവധി പേരെ ഇത് സാരമായി ബാധിച്ചിട്ടുണ്ട്. എത്രയും പെട്ടെന്ന് ഗതാഗതം പുനഃസ്ഥാപിക്കാനാകുമെന്നാണ് പ്രവാസികൾ അടക്കം പ്രതീക്ഷിക്കുന്നത്.
